٢٠٠٧-٠٦-٢٦

تاج.. يبدأ من هنا..!


هذه أسئلة اتزنقت فيها في لعبة ماسنجرية وأجبت عليها.. بعدها رأيت أنها تصلح لتكون تاجا.. فرصة أستمتع بتدبيس الناس زي ما أنا اتدبست!

أسئلة معاميقي شوية:


= لما بتشوف واحدة جميلة قوي بتشيل عينك بعد قد إيه؟

هممم.. غالبا بعد أول نظرة.. عشان معظم الجميلات قوي بيبقوا مغرورات قوي!

فبابقى عايز أحسسها إنها مش موجودة!


لو لك 3 أمنيات هيتحققوا.. هيكونوا إيه؟ (بس حاجة خاصة بك أنت)

= والله ممكن أول أمنية تبقى مادية كعادة أي حد بيلاقي فانوس سحري!

يعني الواحد يبقى عنده عشروميت مليون ولا حاجة.. بعد كده أنا هاتصرف!

يعني.. أمنيتي التانية اني أحقق ذاتي أدبيا.. الرواية.. أكتبها..

يبقى عندي مصدر دخل كويس.. عشان أعمل اللي أنا عايزه

من غير ما اشتغل عند حد ..

في الآآآآآآآآآآآآآخر بقى.. هاتجوز!

بس دي مش أمنية!

ده قدر!!


= آخر مرة بكيت؟

مش فاكر!


= إيه أكتر حاجة بتحبها في نفسك؟

موضوعي.. محايد.. مش باغضب لنفسي غالبا.. يعني ممكن أتناقش مع أي حد وأطلع غلطان وجاهل وأعترف بكده ببساطة من غير ما آخد الموضوع بزعل..


= أكتر حاجة بقى بتكرهها في نفسك؟

الكسل.. كسول جدا بشكل مزعج..


= أسوأ حاجة عملتها !

هممم.. أسوأ حاجة في حياتي؟

حاجات كتير!

بس أسوأها كل الذنوب.. ربنا يسامحني بقى!

همم.. عشان مايتحسبش تهرب: مرة زعلت أمي جدا، وقعدت كتير ماتكلمنيش.. وماصالحتهاش لحد ما اتكلمنا بعد كده عادي.. مش باعرف أصالح حد..

هي حاجة وحشة أكيد.. لكن السؤال بيقول أسوأ حاجة.. مش معقول هقول على الجبنة الشيدر اللي كنت باسرقها من التلاجة وانا صغير مثلا (حتى أبي نفسه لا يعرف حتى الآن!)


= مبادئك.. ثابت عليها؟

اه.. لكن هي مش ثابتة!

يعني أنا قناعاتي بتتغير.. على حسب ثقافتي وتجاربي وتفكيري ونضجي.. كده..


= لو رجع الزمن بيك مين الشخص اللي تختاره أنك متقابلوش؟

أنا مقتنع بأن كل حد شفته أو أي حاجة عملتها خلاص.. حصلت.. وحتى لو غلط فهي فادتني..

مش باقتنع بأماني الـ undo..!


= لأي مدى ممكن تضحي ؟

اقصى حاجة يعني؟.. هممم.. صعب برضه..

بس ممكن أضحي بحياتي نفسها في ظروف معينة.. أتمنى أكون صادق في دي..


= بتبكي من غير سبب؟

لا

أنا أصلا صعب أبكي بسبب!

بابكي من جوة بس.. وأكيد مش من غير سبب..

بس ممكن يبقى سبب ما يبكيش حد غيري.. لو اعتبرنا ده بكا..


= أنت قوي؟ (في تصنيفك لنفسك)

همم.. مش عارف بالضبط

لكن من جوايا قوي

طفل عمال يلعب!


والآن الجزء الأكثر إمتاعا.. أمرر التاج لـ :

إبراهيم معايا

محمد النقيب

الأخ الروحي

البتاعة

حامل شعلة المخلدين

محمد ياسر

ريم البرارى المستحيلة

مصطفى يحيى

ملكة

إيما

شادي

مواطن مقهور

Mirage

Ihab the 2nd

٢٠٠٧-٠٦-٠٥

ياجرادك يا مصر !



خبر في الدستور اليومي عدد الأحد 3 / 6 / 2007.. الخبر يحتوي على ثلاثة أخبار أو تصريحات.. لاحظها
جيدا وقارن بينها:

1- تقرير عن منظمة الفاو (منظمة الأمم المتحدة للأغذية والزراعة) يكشف عن تكاثر مكثف للجراد في جنوب شرق مصر على ساحل البحر الأحمر، والتقرير يتوقع غزو أسراب الجراد لمنطقة بحيرة ناصر..

2- د. عبد الرحمن أمين أستاذ الحشرات بزراعة عين شمس والمتخصص في الجراد يؤكد أن تكاثر الجراد في جنوب شرق مصر سيؤثر بالسلب على الزراعة في منطقة بحيرة ناصر وما حولها.. ويضيف: مما يزيد من حجم المشكلة وجود تكاثر مماثل للجراد في السودان، مما يؤكد احتمال تعرض مصر لغزو الجراد القادم من السودان.. وهذا سيتوقف على اتجاه الرياح..

هذا أيضا أكدته منظمة الفاو..

3- المهندس محمد عبد الرحمن مدير إدارة الجراد بوزارة الزراعة ينفي وجود تكاثر للجراد في جنوب شرق مصر، كما ينفي أن تكون مصر معرضة لغزو أسراب الجراد القادم من السودان!!

والآن.. ماذا تفعل عندما تقرأ هذا ؟

تشد في شعرك؟

منظمة الفاو بتقولك فيه جراد.. والمتخصصون يؤكدون الكلام نفسه..

الباشا المسئول بينفي ليه؟

على أي أساس؟

أيكون الرجل متأكدا لأن السجلات عنده لا تثبت أن الجراد أخذ تصريحا بالتكاثر في جنوب شرق مصر؟

على أساس أن تكاثر الجراد هناك، حتى لو حدث فهو بدون تصريح، وبالتالي هو غير قانوني ووغير معترف به!

أم أن الأخ المسئول أساء الفهم، وظنهم يتحدثون عن الجراد البشري وليس الجراد الحقيقي، فسارع بأداء واجبه المقدس في الدفاع عنه؟

هل اعتاد الجميع على صيغة "كله تمام" و"الأمن مستتب"، والسلام؟

وما المشكلة في أن يكون هناك تكاثر وغزو للجراد؟.. هل سيُعد هذا تقصيرا من الرجل؟

طيب وهو ماله!

الجراد تكاثر في السودان.. ليس ذنبه إذن.. الرجل لن يذهب إلى السودان ليعطي للجراد حبوب منع الحمل.. كما أن إعلانات تنظيم الأسرة لم تعد تجدي نفعا مع الجراد؛ لأنه غالبا لا يشاهد التليفزيون المصري!

أسلوب غريب جدا.. على كده بتوع الأرصاد ينكروا إن الجو حر، ويقولوا كله تمام يا ريس والدنيا ربيع حتى في الصيف والجو بديع وقفل لي كل الملفات قبل الجرد!

أدعو الله للأخ المسئول أن يرزقه بجرادة عملاقة (في حجم مازنجر كده!) تقصده هو شخصيا، وتكون مصابة بالحول فتظنه عشبا أخضر!!