هذه أسئلة اتزنقت فيها في لعبة ماسنجرية وأجبت عليها.. بعدها رأيت أنها تصلح لتكون تاجا.. فرصة أستمتع بتدبيس الناس زي ما أنا اتدبست!
أسئلة معاميقي شوية:
= لما بتشوف واحدة جميلة قوي بتشيل عينك بعد قد إيه؟
هممم.. غالبا بعد أول نظرة.. عشان معظم الجميلات قوي بيبقوا مغرورات قوي!
فبابقى عايز أحسسها إنها مش موجودة!
لو لك 3 أمنيات هيتحققوا.. هيكونوا إيه؟ (بس حاجة خاصة بك أنت)
= والله ممكن أول أمنية تبقى مادية كعادة أي حد بيلاقي فانوس سحري!
يعني الواحد يبقى عنده عشروميت مليون ولا حاجة.. بعد كده أنا هاتصرف!
يعني.. أمنيتي التانية اني أحقق ذاتي أدبيا.. الرواية.. أكتبها..
يبقى عندي مصدر دخل كويس.. عشان أعمل اللي أنا عايزه
من غير ما اشتغل عند حد ..
في الآآآآآآآآآآآآآخر بقى.. هاتجوز!
بس دي مش أمنية!
ده قدر!!
= آخر مرة بكيت؟
مش فاكر!
= إيه أكتر حاجة بتحبها في نفسك؟
موضوعي.. محايد.. مش باغضب لنفسي غالبا.. يعني ممكن أتناقش مع أي حد وأطلع غلطان وجاهل وأعترف بكده ببساطة من غير ما آخد الموضوع بزعل..
= أكتر حاجة بقى بتكرهها في نفسك؟
الكسل.. كسول جدا بشكل مزعج..
= أسوأ حاجة عملتها !
هممم.. أسوأ حاجة في حياتي؟
حاجات كتير!
بس أسوأها كل الذنوب.. ربنا يسامحني بقى!
همم.. عشان مايتحسبش تهرب: مرة زعلت أمي جدا، وقعدت كتير ماتكلمنيش.. وماصالحتهاش لحد ما اتكلمنا بعد كده عادي.. مش باعرف أصالح حد..
هي حاجة وحشة أكيد.. لكن السؤال بيقول أسوأ حاجة.. مش معقول هقول على الجبنة الشيدر اللي كنت باسرقها من التلاجة وانا صغير مثلا (حتى أبي نفسه لا يعرف حتى الآن!)
= مبادئك.. ثابت عليها؟
اه.. لكن هي مش ثابتة!
يعني أنا قناعاتي بتتغير.. على حسب ثقافتي وتجاربي وتفكيري ونضجي.. كده..
= لو رجع الزمن بيك مين الشخص اللي تختاره أنك متقابلوش؟
أنا مقتنع بأن كل حد شفته أو أي حاجة عملتها خلاص.. حصلت.. وحتى لو غلط فهي فادتني..
مش باقتنع بأماني الـ undo..!
= لأي مدى ممكن تضحي ؟
اقصى حاجة يعني؟.. هممم.. صعب برضه..
بس ممكن أضحي بحياتي نفسها في ظروف معينة.. أتمنى أكون صادق في دي..
= بتبكي من غير سبب؟
لا
أنا أصلا صعب أبكي بسبب!
بابكي من جوة بس.. وأكيد مش من غير سبب..
بس ممكن يبقى سبب ما يبكيش حد غيري.. لو اعتبرنا ده بكا..
= أنت قوي؟ (في تصنيفك لنفسك)
همم.. مش عارف بالضبط
لكن من جوايا قوي
طفل عمال يلعب!
والآن الجزء الأكثر إمتاعا.. أمرر التاج لـ :
حامل شعلة المخلدين
Ihab the 2nd
ههههههههه يعنى انا داخل اشوفك و اعرف اخر كتاباتك اقوم الاقيه تاج و اخاف اللى فى بالى يحصل فابص تحت كده و الاقينى
ردحذفماشى يا عم مفيش فايدة التاجات ورانا ورانا برضه
تحياتى
انا ايضا دخلت اقول اخر اخبار دفدف وجدته قد مرر لي هذا التاج
ردحذفهذا ثاني تاج يمرر لي في اقل من الاسبوع
عموما انا كنت داخل لحدث تاريخي هام الا و هو ان اضيف رد اخيرا في هذه المدونة الجميلة
الي الامام يا محمد و ربنا يبارك لك في قلمك و عقلك و افكارك يا رب ..
اخوك ايهاب
محمد ياسر:
ردحذفنياهااهاهاهاهاااااااااه.. مفأجة.. صح؟
ياباشا هدفنا راحتكم وتدبيسكم دائما!
عيش بقى مع التاج اللذيذ!
قيهاب:
يا باشا نورتني أخيرا.. تستاهل بقى!
مفيش فايد يا بوب.. الاستجوابات وراك وراك.. ههههههههه
رنا يخليك يا باشا.. وحياة ربنا انت منورني أصلا :)
يعني نقولك حمد الله علي السلامة بعد غيبتك التدوينية دي ولا نقول الله يسامحك علي التدبيسة الصعبة دي..يبدأ من هنا يعني لو حد معجبوش سؤال .....طيب ربنا يستر
ردحذفويلا بقي هاقول الحاجتين..حمد الله علي السلامة..والله يسامحك:)
نياهاهاهاهااااااا
ردحذفشرير قوي!
يا باشا الله يسلمك.. دي حاجة بسيطة كده .. على سبيل الهدية بمناسبة عودتي الميمونة.. ولا هي مش ميمونة؟
يبدأ من هنا يعني تجاوبي من سكات.. مفيش فصال ولا نقاوة!
الله يسلمك ياستي.. والعفو.. ده أقل واجب!
هههههه
ههههههههههههههههه
ردحذفمش عاوز تغر المذذ؟؟؟
لا ياواد شاطر
وبكد بكد ميرسى كتيغ على انك مغغتلى التاج ده
بس انا حرد عليه كمان اسبوع كده لانى لسه ناشرة تاج
لما ينشف وألمه انشر بتاعك
اشطة يامان؟؟؟
اه صحيح نسيت اقول
ردحذفانا كمان مررتلك تاج :-)
البوتاعة:
ردحذفهه؟
مررتيلي تاج؟
عاااااااااااااا
هو اللي بنعملله في الناس يطلع علينا في ساعتها كدة؟
ماشي يا باتعة.. مردودة لك.. إن ما كنت أبعت لك 6 تاجات في بعض ما أبقاش أنا خالو!
آه.. مش عايز أغر المزز أمال إيه.. هي المزة لما تتغر تبقى مزة أصلا؟
ههههههه
وبعدين تاج إيه اللي نشرتيه وهينشف ده؟.. همم.. هروح أشمت فيكي هناك..
سي يو!
http://www.4shared.com/file/18131921/d01f6b07/__online.html
ردحذفدي أيدوم النهر.. مش عارفة رفعتها صح ولا أيه علشان أنا مش باعرف اتعامل مع الدوشة دي أوي..لو طلع غلط قوللي بس من غير تريقة ماشي:)
آه ..أول كام دقيقة هتلاقيهم سوليست جيتار لو محبتهاش عدي أول 4 دقايق
هو مفيش كومنت الا على البلوجات .. اصل عاوز اقول حاجة ملهاش علاقة بالتاج ده :)
ردحذفببساطة كده اخيرا اتنشرتلك صور فى المنتدى .. و انا كنت بدورلك على صورة من فتره و مش لاقي عشان اعمل فيك اللى بتعمله فى البشرية .. تسمحلي يا فندم ابهدلك بالفوتو شوب ..احم مش ابهدلك يعني انا مش هعمل غير اللى انت بتعمله فى الناس
ممكن ؟؟ ( وش بريء ) ؟؟
محمد حسن
ميرسي ع التاج يافنان
ردحذفجاوبت عليه خلاث متشكرين كتيير
مستنين تدويناتك القادمة:)
إيما:
ردحذفطيب أشكرك إزاي أنا دلوقتي ؟
فرحت بيها جدا بجد.. والسوليست فظيع، مع إني مش باحب الجيتار قوي، لكن مقطوعة تحفة..
بيبقى كنز بالنسبة لي لما حد يغني القصايد اللي طول عمرنا بنقراها دي.. يمكن عشان كده باحب كاظم.. لكن مين اللي بيغني؟.. حلوة.. ما عكرش عليا جو الأغنية غير النصب الغريب لفعل "يسقط".. مش فاهم على أي أساس يعني بينصبه!
عموما بتحصل.. كاظم نفسه غلط كذا مرة.. المهم أشكرك على هديتك الجميلة.. جت في وقتها :)
محمد حسن:
يا باشا براحتك على الآخر.. هنا تدخل أي بوست وتعلق على البوست اللي قبله، وترغي وتعك براحتك.. وحتى لو عايز نقلبها شاتا حقيقيا مفيش مانع !
مفيش هنا مشرفين.. ;)
عايز تدخل الحرب؟
ما بلاااااااش!
يابني ما انت كمان صورك موجودة.. وأنا عارف ان ليك في الأمور دي بس كافي خيرك شرك.. خلاص.. براحتك.. بس خد بالك هتبقى انت اللي بدأت!
بقولك ايه صحيح.. الصورة بتاعة الدودة اللي انت كنت عاملها لدوداة.. يبقى نزلها في موضوع المتحولين، أو ابعت لي لينك ليها.. أوك؟
ملكة:
يا قهلا يا قهلا :)
إزاي سموك؟
العفو يا ستي.. ده أقل واجب يعني.. جاوبتي على التاج؟. هاروح أصححه وأديلك درجتك!
اتأخرت المرة دي في البوست، عشان كنت مع إيمي.. بنت أختي الجديدة الللي مقررة من أول يوم تدوخنا معاها.. الحمد لله.. عدنا :)
اسف يا محمد مردتش على تعليقك في مدونتي
ردحذفكنت متغيب عنها و فجاة اخذت قرار اني اغلقها و مزودش ولا حرف .. اعتذر
محمد حسن
دفدف ..
ردحذفحلوة إجاباتك ..
ده أول تاج أشوف إجاباتك عليه ..
و الله انت طلعت صريح أهو ( وش بيطلع لسانه )
اما أشوف غيرها بقى
هيكون مين غيري اللي بيقول دفدف ؟؟
محمد حسن:
ردحذفليه بس كده يابني؟
دانا فرحت بيك والله..
خسارة..
طيب.. ياريت تضيفني لو تقدر.. وأنا هحاول أدور على إيميلك وأضيفك.. ولو إنها هاتبقى معجزة لو كملت للآخر لحد ما أضيفك.. لازم حاجة تعطلني أو تنسيني..
عموما هابقى أتكلم معاك في الموضوع ده وأفهم منك.. وكفاية برضه إن المدونة السريعة دي خلتنا أصحاب.. تحياتي..
مريمة:
آه.. شفتي بقى التعذيب بتاع المدونات!
صريح طبعا.. ماكنتيش عارفة كده ولا إيه ؟
هاروح أنا كمان أدور على تعليقاتك التانية!
تعليق ماجاش في بالي أعلق عليه غير لما شوفت إجابة ريم البراري المستحيلة على السؤال ..
ردحذفالسؤال كان : لو شوفت واحدة جميلة بترفع عينك عنها بعد أد ايه ..
إجابتك كانت بتقول إنك بتشيل عينك عنها علطول عشان بتبقى مغرورة و عشان ماتتغرش أكتر و..و..
لو ركزت يا دفدف هتلاقي كلمة (جميلة) و ليس ( متبرجة أو ما شابه ) إيش عرفك إن كل جميلة مغرورة ؟؟؟
مريم
ردحذفلازم يعني الأسئلة المحرجة دي؟
شوفي ياستي.. البنت الجميلة حاجة من تلاتة: إما ملتزمة قوي يعني منتقبة أو مختمرة، وإما محتشمة عادي، وإما عايشة حياتها بقى!
الأخيرة دي اصطلاحا بيقولوا عليها جميلة، حتى لو هي مش جميلة قوي يعني، لكن هي بتبرز شوية الجمال اللي عندها ..
المحتشمة في أحيان كتير بتبقى مغرورة لو جميلة بجد.. جمال صارخ يعني.. بس..
أما الملتزمة فالواحد لازم يبقى عنده دم أصلا بقى ويحترم الحجاب بتاعها ده.. ولا إيه؟