في فلوكة في النيل كنت مع مجموعة طلاب أمريكيين.. جاءت بنت صغيرة تبيع الزهور.. يبدو أنها اعتادت بيعها "للحبيبة".. عرضت زهورها عليهم لكنهم لم يشتروا شيئا.. اقتربت من شاب امريكي يجلس بجانبي، وانتقلت إلى الخطة البديلة المعتادة:
- طب هات جنيه!
كان مستواه في العربية ضعيفا نوعا، لكنه فهم.. ضحك، ولم يعرف كيف يجيبها.. ألحت هي:
- هات "وان" جنيه..!
تدخلت برفق:
- خلاص يا بنتي.. هو مش عايز يشتري!
قالت لي:
طيب هيّ اسمها ايه عندهم؟
- هيّ إيه؟
- يعني بيقولوها إزاي؟
- أيوة.. اللي هي إيه يعني؟
- يعني بيسموها إيه في بلدهم؟
- أيوة يا بنتي.. اللي هي إيه عندنا؟
- يعني الجنيه عندهم اسمه إيه؟
ضحكت وقد فهمت اخيرا:
- آآآآآه.. تقصدي العملة.. عندهم اسمه دولار!
التفتت إليه قائلة:
- طب هات "وان دولار"..!
- ............ (يضحك فحسب)..
- طب هات "وان دولار".. يارب تتجوز البنت الحلوة دي (قالتها وهي تشير إلى طالبة أمريكية قريبة..)..
الولد كان "سخسخ" تماما.. نسى نفسه وقال لها بالإنجليزية:
- أنا لا أنوي "مواعدة / date" أية فتاة من هؤلاء..!
أوضحت له:
- هي لا تتكلم عن "مواعدة" هي تتمنى لك الزواج فورا!
"ازبهل" الفتى، ولسان حاله يقول (وكمان جواز؟!)..
كلمت البنت بجدية، وكأنها شخص كبير:
- يابنتي خلاص.. هو مش هايشتري.. لو كان هايشتري كان هايدفع.. هو مش هايشتري، يبقى هايدفع ليه؟
رمقتني بنظرة متفحصة، ثم التفتت إليه بـ"تناكة" وقالت:
- يعني "نو"؟
أشار إليها أن "نعم".. فانصرفت بلامبالاة...
بيتهيألى اللى حصل ده أحسن كتييييييير من اللى بنسمع أنه بيحصل في أمريكا ـ حد يطلع عليك بسلاح ويهددك لتعطيه ما تحمله من مال ـ على الأقل ضحكله شوية.
ردحذفربنا يقدرك و تستحمل الملل و السخافات دي
ردحذفالحمد لله انها لم تفعل ما هو أسوأ علي الأقل دي اكتفت بالغلاسة ومتصرفتش بعدوانية
ردحذفأعرف حكاية شبه كدة بس كانت بطلتها بنت صغيرة بتبيع سلاسل وعقود وحاجات زي كدةوعرضت بضاعتها علي بنت استرالية بتدرس وبتشتغل هنا في مصر ولما رفضت تشتري رغم الحاحها ضربتها علي رأسها وشتمتها بأبشع الألفاظ وبانجليزية متقنة جدا وكانت النتيجة ان جالها اكتئاب وضغطها ارتفع لوقت ووقفت شغلها ودراستها لفترة لحد ما نسيت شوية ..
بعد كل الحكايات دي باحس ان كلامنا عن كرم الضيافة وأهلا بيكم في بلدكم التانية مصر وكل الكلام الجميل ده أوهام!!
بس انت المفروض تجمع المغامرات والحوادث والطرائف دي كلها يمكن بعد كدة تتحمس وتنشرها في كتاب عن مغامراتك مع الأجانب واللي بيشوفوه في بلدنا
:)
تحياتي
أختي العزيزة الغالية:
ردحذفنعم.. هذا الموقف طريف أكثر منه مزعج.. لكن الأمور ليست هكذا دائما للأسف.. هناك ما هو أسوأ بكثير...
إيهاب:
ربنا يقدرني وأعلمهم ازاي يتعاملوا مع الحاجات دي زي المصري ما بيتعامل معاها...
إيما:
نعم..
لكن العدوانية موجودة في مواقف أخرى، ليس أسوأها هذا الموقف الذي ذكرتِه..
هناك أشياء لا أدري كيف أكتبها هنا، وتظل المدونة محترمة..!
فكرة جيدة حقا.. أشكرك عليها :)
ههههههههههه
ردحذفطب ما تجيب تو باوندز :P
تدوينة لطيفة .. وموقف سخيف يتكرر كثيراً
على فكرة .. أنت فنان فعلاً .. مدونتك شكلها ونظامها تحفة .. أحييك !
يعني نو :D
ردحذفحلوة اوي الجملة دي
جود باي
ميرو:
ردحذفأشكرك يا فندم.. وأهلا بكِ في مدونتي المتواضعة.. شاي؟
اشكرك بعنف.. ونوريني دايما :)
أحمد جمال:
فعلا.. كنت مسمي التدوينة كده الأول وبعدين غيرته في آخر لحظة..
جود إيفينينج!